احمد وبدايته مع عالم التكنولوجيا 

اول ما سحبت خط انترنيت بال٢٠١١ جنت حالي حال اي شخص ابحث عن فديوهات وصور واخبار وفيسبوك والعاب والخ ... بس مره جنت ابحث عن شي معين ودخلت لموقع فصفنت شوي وكلت هاي شلون يسووها للمواقع وعجبني تصميم الموقع جان كلش حلو بحيث وراها اتجهت بالبحث عن تصميم المواقع وطبعا اليوتيوب جان اول وسيلة للبحث ضليت اباوع ع الفديوهات الموجوده باليوتيوب الى ما يقارب ال١٠٠٠ فديو وبهاي الفتره تعلمت شي بسيط عن تصميم المواقع وبهالفتره جانت المنتديات vb هي الطاغية ع الشبكة بحيث تعلمت شلون اسوي منتدى واصمم ستايل خاص بي واستمريت سنة كامله بهالمجال وحتى صممت منتديات لاثنين اشخاص من الخليج ,بعد فتره رجعت لنفس السؤال وعدلت ع منطوقه بحيث صار سؤالي كالتالي ( شلون انشأ موقع كامل ) فاكشتفت انو الموقع يمر بهواي مراحل حتى يكمل ويطلع بالشكل الي نشوفه فدخلت لعالم البرمجة ولغات برمجة الويب ولغات التصميم واستمريت سنة هماتين بهذه المجال بس مكدرت اسوي موقع كامل يعني مجنت مقتنع بي . بعدين انقطعت بسبب الدراسه سنة ونص
وراها رجعت لهذه المجال بس رجعت وكلي لهفة وحيويه حتى اكمل الي بديت بي وباقل من ٦ اشهر كدرت انشأ موقع شبه كامل ومن الصفر برمجته حرف حرف ووره سنة انشأت موقع ثاني (تصميم + برمجة ) وجنت راضي عنه الى درجة يعني وحتى ممصدك انو اني وصلت لهيج مرحلة وتذكرت سؤالي الي جنت اسأله دائما ( شلون اسوي موقع ) والحمدلله بعد ٤ سنوات كدرت اعرف شلون اسوي موقع صح مريت بايام جنت محبط ويأست وضجت بس جنت كل ما اواجهه مشكله معينه سواء بالتعلم او بالكود او باي شي جنت اكول باجر تنحل وتصير ذكريات وفعلا صارت ذكريات وذكريات حلوه .
وطبعا بعدني مستمر بهذه المجال ولحد اليوم اني يوميا اتعلم اشياء جديده تخص مواقع الويب وتطويرها

خلي عندك هدف واضح واسعى لتحقيقة مهما كانت الظروف لان لمن يتحقق رح تحس نفسك انجزت ولو شي بسيط من طموحاتك وحتفتخر بنفسك .

يوسف وبدايته مع عالم التكنولوجيا 

بدايتي واهتمامي بالبرمجة من الخامس الاعدادي سنة 2011،

حبيت البرمجة وتصميم الواجهات كانت بدايتي بلغة Visual Basic برمجة مجموعة من البرامج من آلة حاسبه و الألعاب البسيطة مثل XO

وبسنة 2014 كانت بدايتي لدخول عالم تطبيقات الاندرويد وبديت برمجتي على فريمورك B4A البرمجة بي سهلة لأنه كان يعتمد على لغة فيجول الاستديو وبرمجة من خلاله مجموعة من التطبيقات وكان من أشهرها تطبيق Grid Drawing تطبيق للرسم أفاد الكثير من الناس وتجاوزت عدد تحميلات من متجر كوكل بلي 50 الف تحميل وان جنسيات محملين هذا التطبيق مختلفه من العرب والاجانب وبسنة 2016 بدأت أتعلم لغة الجافا كنت اعتبرها أصعب لغات البرمجة ولكن أكملتها خلال شهرين وبرمجة وصممت اول تطبيق محلي اسمه "بورصة بغداد "وكان سبب تقدمي هو التشجيع الذي احصل عليه من التقييمات والشكر ألي يوصلني من مختلف الدول والغات حيث كان

هذا أكبر حافز الي حتى تنجح كمبرمج تطبيقات دائما فكر بمشكلة و اوجد حلولها و استلهم من التطبيقات السابقة و دائما ضع لمستك الخاصة بتطبيقك ودائماً لا تخافون من الاشياء التحسوها صعبه التعلم .. انتم جربوا تتعلموها وراح تشوفوها شويه شويه تسهل وياكم ودائماً الاشياء ال تبدي صعبه هيه الي توصلك للنجاح مو الاشياء ال تبدي سهلة .ولا تهتم لأي انتقاد سلبي من اي شخص .. المهم كون واثق من نفسك ومقدر المجهود ألي بدلته

واستمتع بكل كود تكتبه ..